GTA4首賣日贈Points活動延長：好消息定壞消息？

相信大家都好似小弟一樣，超級期待緊星期二（29/4)GTA4發售嘅大日子。無論有冇預訂到,到星期二嗰日究竟買唔買到隻game，可能係各玩家心裏嘅疑問。本身隻game就已經受歡迎，再加上之前香港Xbox攪嘅首賣日玩GTA4送500 MS point嘅推廣，就更加令到一眾玩家早早盤算定點樣係29號搶到一隻GTA4。

係嘅，500MS pts喎，成四五十蚊架喎，只要係Xbox個官方網頁道登記咗自己個Gamertag，同埋係29號開隻GTA4上上Live就攞到，真係幾吸引。亦有人因此話就算29號就算炒價賣番嚟，都叫做有得offset吓咁啦。

但係唔知點解，係離發售日仲有兩日嘅今日，0係GTA4官網竟然見到呢段通告：

Grand Theft Auto 4 贈獎活動更新通知

感謝各位註冊參加本活動。只要在遊戲首發日(時間延長至 5月 5日前)上 Xbox LIVE 玩 Grand Theft Auto IV，就可獲得 500點 Microsoft Points。

可能大家會話，延長到5月5日前都可以有points攞，係好消息吖。我同意此舉對壓止炒風，會有一定程度嘅好處，起碼唔會為咗points而29號個個逼著收工嘅時候一齊非理性地撲出旺角、深水埗嘅game場，好似水魚咁畀啲奸商屈。但係，延遲個deadline，會唔會係MS對首日供貨量冇信心嘅兆頭呢？其實有可能MS發覺首日嘅到貨量太少，驚到時想攞points但又撲唔到game嘅群眾失控，又發生好似Halo 3國語版、N3邪神像咁嘅PR大災難？

鍾意諗縮數嘅我係度諗，似乎呢一個禮拜會有好多登記咗贈Points活動嘅人，會慳番唔買著，淨係係圍內互相借張遊戲碟嚟攞points喇。