激情不再？當遊戲玩家步入中年

早兩日係Kotaku.com睇到一段文章，講到當自命熱血嘅遊戲玩家出現以下徵狀嘅時候，佢嘅遊戲青春已經遠去啦。以下我節錄嘅特徵，睇下你有邊幾個中？

1. 你寧願齋對電腦，都唔想同人係網上對戰。
2. 你只會係你女友/老婆唔得閒或者訓左嘅時候先至打機。
3. 爆機、完全攻略或開成就對你來說不再重要。
4. 你發覺你對上一次開機已經係大半個星期前。
5. 你可以大聲講：“好遊戲，不論機”，因你有齊3大主機。
6. 你經常懷緬當年嘅經典遊戲。「FF3係FF系列最頂峰，之後嗰啲完全唔掂啦。」
7. 你唔係咁想玩Wii，因為周身郁會好累。。。
8. 你玩FPS，經常被秒殺都唔知乜野事，而你硬係打唔中人。「唉，又死。係唔係lag呢？」
9. 你覺得Boardgame改編嘅遊戲都幾好玩。「一齊上Live打Carcassonne吖？」
10. 你覺得首賣日買唔到GTA4都冇乜大問題。「算啦，橫掂要到星期六日先得閒玩。」

我會加多一個11. 你已練成“買咗都唔玩”神功，齋儲game。：）

以上咁多點你中幾個呢？我就不幸中左成7、8個。。。