回味翻叮：Lost Odyssey 失落的奧德賽

一個人能活上千年，是一種什麼滋味呢?親歷無數的悲歡離合後，不老不死的生命是否只是意味着日復日的虛空？

回味番叮: GTA IV

花左唔知幾多時日，終於完成左今年其中一隻必玩遊戲GTA IV既故事模式，於是就整左呢一篇俾呀老編PC…

首先，大家要知道GTA IV係d咩黎先，GTV IV係由Rockstar開發，用於次世界Console平台(XBox 360 / PS3)上既遊戲，其中既重點在於建立左一個極之龐大既遊戲世界(今次GTA IV入面參考左真實的New York City，建立在一個叫Liberity City既虛疑世界)，遊戲就係一個Free World模式，基本上，你係入面既Action係完全可以自已決定…由於遊戲一般來講都係以Underworld既黑暗規律(即係一個犯罪世界，玩家係入面既主要活動就走私，販毒，殺人，開火…諸如此類)，所以每一集GTA既推出，基本上都係會被一班「衛道之士」所抗議…不過，作為一個玩家，對於依d不關涉既議題，基本上係好少理既…

GTA IV既故事係由偷渡進入美國，來到Liberity City尋找表親Roman既東歐人Niko Bellic到步開始，一心希望實現American Dream既Niko發現，Roman之前係家書入面所寫既奢華生活完全係講大話，而且仲欠落大耳窿一大筆債…為左保護依個唔似樣既表哥，Niko逐步踏入左Liberity City既地下世界，由一個靠拳頭恐嚇收爛數既古惑仔開始，最後捲入Liberity City入面，六大黑幫家族既角色中既一個磨心…

而隨著故事既開始，Niko Bellic會同唔同既人物進行Interaction，而係依d Interaction之間，我地會逐步睇到Niko Bellic經已破碎既靈魂…Niko本身既國家爆發內戰，本著一腔熱血，Niko與一班同鄉朋友一齊投身成為軍人，但係係一次任務之中，部隊內既內鬼(Niko既其中一個同鄉老友)將整隊人出賣…Niko成為部隊僅存既三個倖存者，之後被標籤為「叛徒」，被迫出國，去到歐洲，從事販運人口既勾當，結果遇上左警方既堵截，任務失販，成為黑白兩道追緝既人物…係迫於無奈既情況下，Niko到Liberity City投靠Roman…

Niko接觸既每一個人物，都有著佢自己本身既過去，而且係一個比一個更加陰沉，黑暗，成個遊戲既tone係一路向悲劇既方向發展，最後Niko亦都因為踏足犯罪世界而最終不能自拔，付上左極大既代價…由於遊戲入面涉及左極之大量既犯罪活動(其中一個任務係打劫銀行，期間要突破由LCPD特警所組成既包圍網)，加上唔少殘殺他人既情節，所以依隻遊戲，係只推介俾心智成熟既玩家(唔好玩完隻game之後學日本秋葉園個「毒男」咁，衝出旺角亂咁殺人)…成隻Game係充滿左電影感，基本上玩game就好似睇戲一樣…一隻好既遊戲，就係應該可以令到玩家有咁既投入感(即使妳唔鐘意打機，但係亦都應該可以感受到故事既感染力，就好似睇一本好書既感覺一樣…)

的確GTA IV既最大吸引力係來自佢個劇本，但係同時地佢係技術上都有好多既突破，雖然畫面正如之前講過，唔算係超級頂班，但係考慮到佢果個龐大既遊戲世界，Niko駕駛著一個車，由城市內既一個島穿過去另一個島，中間係唔會有明顯既Load碟情況，單係依一點就係一個重大既突破，而且遊戲係以實時進行，有日與夜既交替，陰與晴既天候變化，其中光源及物件都會因應而改變，創造一個擬真既世界，反映製作團隊既卓越技術力…

遊戲入面有電台(19個)，電視台(八至九個不同節目)以及互聯網(30多個網站，其中部份係會不停更新)，全部都係搆成一個整體世界既細節，遊戲入面Niko可以用手提電話聯絡不同角色，甚至溝女，大家會一齊出街玩，有各式活動(打保齡，打Pool，掟標，睇脫衣舞…)，一個遊戲，單人模式就已經係咁豐富，仲有online既多人連線模式…

整體來講，GTA IV必然係當今眾多遊戲之中，其中最頂班既作品之一，AK認為，係任何擁有次世代主機既機主必玩既一隻作品…

回味翻叮：Rainbow Six Vegas 2

依排AK既私人生活出現左重大變動，情況就好似係Roller Coaster(即係唔及四川果邊咁大鑊，所以大家唔駛捐錢俾AK，請捐俾果邊d災民啦，佢地好需要大家幫手架)咁誇張，所以有成兩個星期脫左稿…

經歷左兩個星期之後，總算生活又重會正軌(其實實質係太過沉迷於「正常，健康既犯罪生活」GTA4)，為左避免俾老編PC「殺他死」，於是就惟有暫時放下「殺人放火金腰帶」既生活，開始「中年筆耕」既生涯，今次既回味番叮要講既係早前萬眾期待，但最終因為大貨及時應市(多謝代理迅速行動，人人有Game打)，結果炒唔起既Rainbow Six Vegas 2。

首先係，大家應該點樣去睇Rainbow Six Vegas 2呢隻Game呢?類型上，佢當然係一隻FPS啦，但係當你正式玩起上黎既時候，你又會發現同你之前打既Gear of War，Call of Duty 4等等係有d唔同既，最大既分別係，成個game整個pace係唔似一般既FPS咁緊迫，你係有時間係去plan你個attack既…留意啦，plan呢個字好緊要，因為R6V2係標榜Tactical，即係講求戰術性既一隻Shooter…

R6V2既戰術性係由好多個唔同既因素所組成既，其中一個重點就係在於一貫以黎，同一個系列既出色版面設計，整個戰場環境既Set Up唔單單只係像真，而係合乎正式同類型建築物既設計，酒店似番酒店，煉油廠似番間煉油廠…唔好以為依樣好容易，好多FPS為左遷就遊戲性既考慮，搞到d地圖變左迷宮咁不倫不類，完全唔似正式既建築物…

合乎正式建築物既設計除左加強左玩既時候既代入感之外，另外一個重點就係不少的建築物係有四通八達既出入口同埋通道，配合R6V2敵人既卓越AI，結果就係出現唔少係無預期既情況下遭人突襲既場面…所以，打R6V2既刺激感唔係來自於急速既遊戲節奏，反而係沿自於果種隨時係無預備之下俾敵人突擊既壓力…

講到AI，自然又唔可以唔提下自家人既AI，依一方面來講，R6V2雖然標榜小隊合作，不過就唔見得真係特別地出色，大致上既表現都只係中規中矩，當然無話好似Army of Two果隻會自己衝入敵人火線度捱子彈，之後坐低叫救命，迫你救佢果隻咁差，但係就同Gear of War差不多，打人都係靠自己啦…

咁…彈開自己人個AI，又順手彈埋R6系列一直以來都俾人鬧既另一個地方，就係佢既畫面質素…雖然R6V2比起上一集來講係有左一d既改善，但係你話佢追得上依家頂班FPS既水準，AK就覺得有d勉強啦…相信有唔少既玩家可能係單純係出面睇Demo既時候，見到個咁既畫面質素而卻步都唔定…

打R6V2另一個重點，當然係Multi play啦，今次相對於R6V來講，Multi play既改進算係好大既，首先係你可以join朋友個in game打co-op，AK總係覺得，FPS唔係一個單人遊戲，由其係R6系列所標榜既戰術性，係一定要一隊人先做到…另外，Terrorist Hunt又係一個必玩既feature，雖然…有時好似係被Terrorist去Hunt咁…仲有就係，你係Single Play入面可以升Level，開新槍新甲，依點對於AK依d FPS「苦手」來講，係相當親切既設計…

最後，都係要彈多一樣野，就係去到最後尾，居然出動到戰鬥直升機黎「欺凌」玩家，雖然係其他FPS入面，唔好講直升機，就連坦克，戰鬥機榜人呀…都曾經打過唔少，但係係R6V2入面，你拎住枝「豆槍」去射架直升機就真係…另外，最後尾手刃叛徒既感覺唔係好得…多多少少同個畫面質素有d關係…

Anyway…R6V2，AK會俾8分…

回味翻叮 — Call of Duty 4: Modern Warfare

Xbox日替開張之喜，係「番叮」依一個環節入面送俾大家既係2007年度公認水準最高既FPS遊戲，Call of Duty 4: Modern Warfare。對於呢隻Game相信大家都真係記憶尤深啦…因為呢隻可以講係香港Xbox 360遊戲進入炒賣期既一隻矚目之作，由最初既299，一路炒上四百幾，五百幾蚊都仲有唔少朋友去馬，直到依家，CoD4仲係踩住近四百蚊既價位居高不落，加埋近排仲有新map pack俾大家download (不過要成800 pts都幾係野架)，所以真係值得拎番佢入部機度，「叮」佢一「叮」…

講左成段都未殺入正式，小記應該就黎會俾老編拉出去打…Anyway，Xbox日替篇幅有限，所以「番叮」既重點係評，要知番隻game詳細既內容，可以上官網又或者其他外國game網睇睇，簡單d講，CoD4係一隻現代背景既FPS，係遊戲既過程入面，你會分別扮演美國同英國既反恐精英，係全球各地執行反恐任務，期間除左連場超緊迫既近距離遭遇及追逐戰之外，你仲有機會執行Sniper暗殺任務，以及操控AC-130砲座以及直升機機關砲。相對於其他唔少既FPS黎講，CoD4係載具既類型同埋操控變化上都算係OK架(即係相對於R6V以及R6V2果隻你由頭到尾拎住一枝槍跑上跑落既情況)，不過就當然比唔上Halo 3咁多樣化(依個係AK唯一滿意Halo 3既地方)…

就畫面質素而言，其實依家差不多隻隻FPS都係用Unreal Engine，各隻Game既表現都係伯仲之間，只可以講一句，係今時今日FPS應有既水準(即係唔係Lost Planet果種水準)，另外，各式武器既表現亦都算係做到應有效果，槍枝係射擊同既時候產生既跳動以及音效都相當「實」(比Halo 3要好好多)。操控黎講，Xbox既FPS經過左咁多唔同既遊戲之後，可以講係evolve到左一個定型…其實，講開又講，相對於Keyboard同Mouse既組合而言，AK更加鐘意用Gamepad玩FPS，正正就係貪佢唔係咁「準確」，更加像真…

講版面設計，CoD4係及唔上R6V及R6V2既水準既，可以俾玩家利用既位置唔係咁多，而且好多建築物既位置以及內籠都顯得太過刻意，整左一堆Cover位，咁就反而少左R6V及R6V2果種真實環境既感覺，不過相對於Army of Two黎講，CoD4既版面設既水準就係合格有餘，但係如果要同Gear of War，又或者R6V及R6V2依d高水準既作品比較，咁CoD4就似乎有d不足。

講左咁多行貨，都係時候Highlight下CoD4既重點，CoD4係AK玩過咁多隻FPS入面，最緊迫既一隻，即係基本上，你係無咩位俾你企埋一邊抖既，由一開始既Combat Training，到之後既船上任務，以及最後兩排，追擊恐怖份子及強攻導彈基地，基本上玩家係要不斷咁向前衝，依個設計令到CoD4全程極富緊迫感，玩家會俾個遊戲催迫向前，真係好緊張架…

不過，依個設定亦都有佢既問題既，最大鑊既就係發生係最尾三排，由你要係敵人包圍之下衝出去搵路上直升機開始，到追擊恐怖份子以及強攻導彈基地，你會發現，好多時你係被迫要扮Rambo衝出去，搏人地射你唔中，閃埋一邊再反擊…中間既過程係完全靠運氣…最尾果版，你要穿過兩個Missile Silo，但係對面果兩個Missile Silo既恐怖分子就會係你背後射你，即係你同時要deal with四個Missile Silo既敵人，AK係呢度死左唔少次，最後幾經辛苦出到黎，Captain Price係你面前施施然咁行過…AK就真係唔係咁鐘意咁既情況啦…

Single Play講左咁多，Mulit Play又如何呢?AK覺得，CoD4既Mulit Play平衡度相當高，不過無可被免地存在一個「死症」，就係新手同老手既技術差距唔能夠靠系統去作出修正同平衡，咁對於好似AK依d周日Gamer而言就有點兒…

整體來講，如果閣下可以係四百蚊左右既價位買到CoD4既Game of the Year Edition(連埋新果四張地圖)，咁AK覺得真係值得「去馬」既，值八分半。

AK評分表(FPS)

GoW 九分，CoD4 八分半，R6V2 八分，R6V 七分半，Ao2 六分半，Halo 3 六分，Lost Planet 四分半