夏日360遊戲巡禮(五): Battlefield: Bad Company

AK既老毛病就係太過專注…眼看住係屋企堆係度未打既game開始陸續堆積，就開始有d緊張…無他既，入左隻「戰國無雙2」有成三十幾個人物 ，之後又入埋隻Condemned 2，郁都未郁過，最近又因為見個價平，連原本話入又唔入既Dragonball Z Burst Limit(299連設定集加figure)都入埋…偏偏隻GTA 4就仲係連故事模式都未打完…所以依三日就的起心肝，不停咁打…總算搞掂左果粒鑽石…結果自然係…脫稿啦…

老編PC交改既Battle Field: Bad Company，download個trial都要成1.5GB，好誇張下…依隻Game面對住之前咁多隻強勢既First Person Shooting，要跑出都真係要有d「符fit」…今次BF既重點係在於全面Destructible Environment，即係你只要對個target做成到足夠既傷害，理論上畫面入面任何既野，你都可以打爆佢…依一點係個demo入面係都可以感受到既，你坐左架裝甲車駛入個廢棄村落俾人圍攻，激戰之間就自然會發現，有d建築物係會被你打lum左既…不過，AK暫時唔覺得依一點除左係視覺上既Eye Candy之外，係戰術上對玩家有幾大既影響，起碼…唔似得Rainbow 6: Vegas 2入面，d cover可以打穿唔震撼…

另外，BF對於戰死沙場一貫都唔會太嚴重咁懲罰玩家，基本上都係俾你係附近就地Respawn，今次Bad Company入面，你果幾位Company似乎係打不死既，基本上你都唔駛點顧佢地，係戰場入面，顧掂自己就OK啦…

Battle Field: Bad Company係六月中出街，雖然依幾個月會有唔少game出，但係出名既FPS似乎係得隻BF，FPS中毒者無可選擇之下，Bad Company應該不難跑出既…

《夏日遊戲巡禮》（四）– Ninja Gaiden 2 忍者外傳2

我當年不識好歹，傻傻地買咗呢隻Game喺Xbox 1嘅前作。買嘅時候隻game都已經出咗一輪，個個都讚佢正，但係人人都話難玩。我心諗：「老夫縱橫Game壇十數載，有乜Game難倒我吖。」

頭十分鐘，確係冇乜難度，齋按攻擊制就殺晒啲嘍囉，仲有時間睇下風景添！畫面真係超越當時所有美國同日本嘅動作遊戲。呢隻遊戲嘅製作小隊就係製作Dead or Alive系列嘅Tecmo Ninja Team，果然名不虛傳。

十五分鐘後，出咗兩隻紅色忍者。當我照樣衝去砍佢哋，佢哋竟然全部擋晒！呢刻我已經心知不妙，點知佢哋重counter-attack埋，連續砍咗我兩三嘢，瓜咗！

「唔。。。。。。」

再試，又死！「頂！@#$%*。。。。」

結果，單單係去到第一版大佬間房，我已經死過十幾次。大佬當然亦唔係善男信女，又係Try->Die->Reload，重複十數次。

無錯，我確係打到想丟手制，但係由頭到尾我都冇覺得隻game有作弊。隻Game要求技術，而且佢會嚴正懲罰Button Mashing。（有啲似Street Fighter 2、DOA, 亂用combo都係死路一條。）迫你檢討自己出招嘅漏洞，跟住又真係過倒關喎。慢慢你就練成一身好武功，可以同遊戲裡面嘅敵人一決高下。（即係死少啲咋 ^_^ ) 「Ninja Gaiden，我會記住你。You are a worthy opponent!」

六月三日隻續集就會來臨，我手心開始冒汗。。。

《夏日遊戲巡禮》（三）– Dragon Ball Z: Burst Limit

近排四川大震災，總理溫家寶到場親自指揮，怒斥庸官，點名徹查「豆腐渣」公程，真係大快人心… 有依個好榜案，老編PC大人即時向庸碌既AK展開催稿大行動，係咁既情況之下，AK今年六月既第一個心水之選即時雙手奉上… 佢就係Dragon Ball Z: Burst Limit…

相信唔少既gamer同AK一樣都係食日本ACG(Animate，comics and game即係動畫，漫畫同遊戲也)奶水大既，但係自從由PS2升左上黎XBOX 360之後，基本上都係預左同日式既ACG「忍著淚說一聲good bye」…

好彩，係云云眾多既ACG入面，龍珠依個牌頭唔止係亞洲紅爆，去到美國之後都一樣咁work，所以Dragon Ball Z: Burst Limit先可以登陸XBOX 360平台…

果陣時AK話會揀依隻做六月首選，PC即刻叫AK睇定d，因為隻game似乎唔會有environmental damage，即係你唔可以好似漫畫咁打到「開山劈石」… 不過AK一於唔理，就係簡簡單單，因為「龍珠」呢兩個字，就等於係去見番一班同自已一齊長大既老友(香港有邊個細路唔係睇龍珠大架…)最緊要係，今次個game cover既部份係由悟空大哥拿迪斯「訪問」地球，去到最終既「斯路遊戲」，AK當年最鐘意就係依段… 之後布歐就興趣大減… 今次，仲有日版既行貨，聽講應該三百頭就攪掂，你話有咩理由唔乖乖俾錢呢…

打法其實都無咩變化，都係上天落地，不停出波… 畫面… 無咩改善… 其實，好似成隻game都係食老本… 但係無計，因為… 「龍珠」…

夏日360遊戲巡禮（二）：GRID

Codemaster呢家公司以往可以話係個人電腦平台上賽車遊戲嘅代名詞。佢既Colin McRae Rally系列及Race Driver系列以模擬細緻真確見稱，再加上華麗嘅聲光效果，流暢嘅操控，成功俘虜咗一眾電腦賽車迷。

雖然Codemaster都有喺遊戲機上面推出同樣嘅系列，但係受歡迎程度始終不及Sega Rally或GT等嘅老牌子。佢未能受遊戲機玩家接受，一來係因為佢Simulation成分太重令到遊戲娛樂成分稍為欠缺，二來Colin McRae Rally同Race Driver系列所描述嘅係歐洲以外嘅玩家比較陌生嘅賽事及車款，令美國及亞洲等地嘅玩家無法投入，非常可惜。

但係廠商去年痛定思痛，重新定位及命名Colin McRae系列，推出咗名為DiRT嘅Rally賽車遊戲。DiRT成功擺脫以上提及嘅缺點，再配以叫人驚訝嘅次世代級嘅畫面，令遊戲機玩家終於可以領略佢原本嘅優點。結果DiRT喺去年一眾賽車遊戲中脫穎而出，叫好又叫座。

食髓知味，今年Codemaster將會如法炮製改造Race Driver系列，將於六月推出名為GRID嘅賽車遊戲。GRID不僅會包含歐洲嘅傳統繞圈賽事，例如著名嘅Le Mans 24 Hour耐力賽，今次更會有世界各地特色賽事，好似美國流行嘅城市Muscle Cars賽事及日本頭文字D式嘅落山飄移賽車。GRID會將焦點放在賽事本身，而唔係好似GT、Forza咁要逼玩家兼顧改車及買車等與駕駛賽車無關嘅細節上。係得360同PS3推出，佢嘅畫面一定唔會失禮啦！喺各討論區上已經有不少人驚嘆，話佢既in-game畫面同Opening Trailer根本冇分別！佢既車內視點更加係一絕，不只可以清晰見到車手入波等嘅細微動作，更完全重現賽車內嘅細節。喺遊戲嘅平衡度上，GRID比起Forza來講冇咁嚴苛，比較傾向近似PGR嘅半Arcade半Simulation，佢甚至提供”生命有Take2″功能，可以optionally畀玩家係撞車後回捲至出事之前幾秒鐘，嘗試修正避過一劫，令某些之前被Forza嚇怕嘅玩家(AK？）都可以享受賽車嘅樂趣。。

其實講咗咁耐，想知道小弟PC我點解咁大力推介，可以拿拿臨去Live Marketplace度下載GRID嘅DEMO，或者睇睇下面嘅in-game footage就曉架啦。

再

夏日360遊戲巡禮(一）：LEGO Indiana Jones: The Original Adventure

當阿AK知道我揀呢隻LEGO Indiana Jones:The Original Adventure作為夏日遊戲巡禮第一炮嘅時候，佢質疑我話，呢隻點睇都唔似係360嘅大作，點解我會揀喎。

冇嘅，有時玩遊戲，未必單單係追求官能上嘅刺激，如果隻game可以帶畀玩家一點歡樂，喚起一點愉快嘅回憶，咁就經已係Time well spent！LEGO Indiana Jones(預定03/06/08推出)係Travelers Tales呢間公司繼LEGO Star Wars系列後，繼續用經典電影系列+LEGO積木呢個大小通殺方程式製作嘅動作冒險遊戲。呢隻遊戲會貫穿《奪寶奇兵》三部曲嘅故事，所有場景人物都係用LEGO堆砌而成，其中當然不乏由經典電影場景惡搞而成嘅滑稽攪笑片段啦。

閒話休提，去片！