根據1up最新報導，忍者外傳系列及Dead or Alive系列作者 板垣伴信 於今日（3/6）日本時間2:30pm向各大傳媒發佈公開信，透露佢已經辭職並將於七月一日離開Tecmo，並且宣佈佢早前已經入稟控告Tecmo嘅主席安田善巳，追討共1億4600萬日圓賠償。
據板垣在公開信內嘅陳述，佢撤職及控告Tecmo嘅原因係因為Tecmo不單未有依照承諾，喺板垣完成Dead or Alive 4後支付花紅，當板垣同主席安田對質嘅時候，安田不但拒絕，近隨後於板垣嘅同事及下屬面前講咗好多詆毀佢嘅說話。板垣認為受到情緒困擾，亦令到工作嘅環境同個人關係變得惡劣，佢喺冇辦法下辭職。
板垣亦係公開信中向佢嘅遊戲支持者表示歉意，今日出版嘅忍者外傳2將會係最後，佢亦不能參與Dead or Alive 5嘅製作，但係佢既離職係迫不得已。“因為我已經不能再和主席安田善巳合作，一個雖然有能力但仍然選擇違背承諾的人。”
Resident Evil 5會係次世代遊戲機推出嘅消息已經講咗成兩年啦，嗰個Teaser Trailer都番睇過唔少次。終於前日Gametrailer獨家播放Capcom釋出嘅新Trailer，當中有唔少Gameplay片段。係非洲嘅熾熱陽光下，不安感反而更加提升？！
剛剛過去嘅Ubiday’08，Ubisoft公佈咗呢隻game嘅新圖片同買Trailer。今次嘅美術風格十分特別，係採用一種半Cellshade半貼圖嘅方法，主角同環境設計著重帶出阿拉伯民族強悍一面，女主角亦都相當省鏡（AK同我都係咁話）。睇埋Trailer，好似有少少Final Fantasy feel添！
以上圖片由Gamespot.com提供，一句唔該！
有上Xbox Live嘅玩家，每個人都有一個稱為”Gamertag”嘅網名，係喺一開始加入Live服務時自己選擇嘅。呢個Gamertag全世界獨一無二，係Live嘅世界就係靠佢代表玩家自己，所以玩家一般選自己呢個虛擬名號時都幾著意，因為之後要轉都幾麻煩。有啲人嘅Gamertags比較花巧，有形有格到睇住都讀唔出。又有另外一啲人就實際啲，Gamertag用番自己個真名拼成。有時單單見到個Gamertag，都可以推測到嗰個人嘅性格，都幾有趣。
但係Kotaku.com有位仁兄最近就突然之間被Xbox Live “ban” 咗佢個Gamertag。其實佢只係用自己嘅全名：
Live嗰邊話佢個名有影射性含義喎。呢位仁兄大呼冤枉：「叫Richard，姓Gaywood，有乜唔妥！！」
係囉，有乜唔妥呢？
根據gamesindustry.biz對XBox Live Arcade Games Portfolio Manager — David Edery作嘅訪問，微軟即將調高XBLA遊戲容量上限，由原本嘅150MB，增加到350MB。據Edery表示，今次調整上限係回應XBLA遊戲製作伙伴訴求，但佢強調並不希望XBLA遊戲容量上限不受控上升，因為有限嘅容量會變相鼓勵遊戲製作者們將焦點放喺設計易玩易上手類型嘅遊戲，而唔係需要巨額製作費嘅超級大作，令XBLA繼續作為一個無論大小廠商都可以參與嘅生態環境。
健康生態環境？唔好自欺欺人啦Mr. Edery。
原本，XBLA剛推出嘅時候，佢既容量上限係細到唔恨嘅50MB。直到07年為咗可以畀Konami於XBLA推出《惡魔城：月下夜想曲》，微軟先至十分不情願地“彈性處理”，並引致其後要正式將上限調至150MB。今次再一次上調容量，相信係因為Capcom今年會推出嘅XBLA大作：Street Fighter 2 HD同埋Bionic Commando Rearmed（即《暗殺希特拉》Remake版）。Capcom之前不斷向各遊戲傳媒放風話呢兩隻遊戲360版嘅畫質將不及PS3版，原因要壓縮遊戲內嘅圖像素材先可以fit到150MB上限喎（PSN係冇容量上限嘅）。果然嚇到Xbox班大帝，即刻開大會，寫悔過書，促成今次再度調高上限。
其實，始終呢個世界都係大石責死蟹，大遊戲廠商始終希望可以維持自己係市場嘅地位，希望用財力逼走其他細小嘅遊戲個體戶。唔公平？係架啦！
喺呢個貪新忘舊，o趙完鬆嘅世界，咪話七年，一年都好似一世咁耐啦！所以，當微軟嘅Shane Kim (佢係Microsoft Gaming Studio 嘅Corporate Vice President)話Xbox 360可以喺市場至少持續七年咁耐，我嘅反應係，“吓？！”
根據Shane Kim同CVG做嘅訪問，佢話Microsoft從一開始就預算360會有一條“長尾”。佢講：「顯然我們在Xbox一代的時候並沒有做到，但我們對360能夠有一條“長尾”相當有信心。」當被問及360硬件上怎樣能夠與時並進（有見360並沒有Blu-ray這樣的高容量媒體，與及硬碟並非每部360必備這個對遊戲開發深遠的問題），他相信360技術上仍然有發展空間，現有360嘅制式上仍然可增加功能也未可知。不過，佢唔認為360只有DVD是局限，「將來有可能有更多跨碟的遊戲，至今我們亦已經發行了好幾隻（他指的是『藍龍』和『Lost Odyssey』。）雖然如此，我並不認為會極端到會令人覺得微軟不使用藍光是錯誤決定。反而至今我們所見，在360上絕大部分遊戲軟件（帶給玩家）的體驗，並未受到欠缺硬點或藍光所局限。」
呢位Shane Kim所講嘅，我唔係咁認同。如果係講緊過去一兩年，有冇Blu-ray、harddisk，可能冇乜所謂，畢竟高清遊戲機都係啱啱起步，遊戲廠商條”高清生產線“剛剛開始順暢，玩家亦係好滿足於seeing something new呢種感覺，畫面只要比上一代提升，已經會好感動。但係過多年零兩年，當玩家們俾遊戲廠商餵大咗個胃口、COD4級嘅畫質已經係奉旨嘅時候，”More! Faster! Smoother!”呢D聲音只會與日俱增。遊戲廠商亦會喺高清內容（高解像texture，電影級嘅Cut-scene、音樂等等）嘅製作費因技術熟練後慢慢穩定下調，以及廠商之間互相競爭之下，趨向令遊戲內容更多更長。到其時分分鐘一關Call of Duty要一張DVD，成隻遊戲要十隻八隻碟先可以裝得晒，而部機處唔處理到就更加係另一回事。話唔埋到時PS3上面run到嘅game，隨時要scale down先至移植到落360！如果，微軟真係以為遊戲廠商同玩家會忍得到，忠貞地唔會過檔去PS3嘅話，就真係naive啦。
計我話，過到2010年年頭好叻架啦。你知啦，玩家係好易痕嘅。
今日小弟見到一隻叫人眼前一亮嘅新game，所以急不及待想同大家分享。Mirror’s Edge係一隻由EA DICE製作嘅非常另類第一身動作遊戲。喺遊戲裡面主人公Faith係一個專送密件嘅信差，為咗逃避耳目經常要行啲與別不同路線，經常要運用佢超凡嘅身手，係近未來城市嘅石屎森林裡面奔跑、跳躍、攀爬、穿梭。暫定08推出，先欣賞一下最新釋出嘅video先！
自從2008年年頭HD-DVD投降唔玩，一眾玩家屋企部360外置HD-DVD盤就變成Microsoft係HD format慘敗嘅墓碑。亦都係差不多同一時間，Microsoft將會將Blu-ray加入為360主機嘅基本裝備嘅謠言就開始滿天飛啦。不過，由開始傳會係GDC08正式公報到今時今日都未有確切消息，似乎呢個真係謠言？
但係台灣方面就不時傳出Microsoft向台灣廠商落單製造藍光360消息。好似星期五台灣經濟日報就有報道消息人士話電腦製造商華碩嘅子公司和碩近期獲得微軟藍光遊戲主機訂單，並且預計第三季開始出貨。
我自己就唔係好信呢啲消息喇。遊戲方面，之前Microsoft不斷重申360只會用DVD作為出版遊戲嘅媒體，不需要亦不會用任何嘅HD制式媒體(包括HD-DVD同埋Blu-ray)，所以先有之前HD-DVD盤要外置嘅決定。而高清電影、電視方面，360已經有相當成功Marketplace嘅下載服務（至少北美），所需要嘅只係寬頻同硬碟，又何需另開戰線？
唯一說得通嘅講法，就係話Microsoft要消除PS3係一部高清播放機嘅advantage，加入藍光另360同PS3係呢方面睇齊。畢竟，我哋見到o係歐洲，PS3真係後發先至，so far o係銷售量領先。論價錢、遊戲數量及質素，360係歐洲應該唔會輸蝕。By elimination，兩部機嘅features上嘅不同又真係好似得番Blu-ray呢樣嘅…
大家點睇？
無論係做彩虹六號嘅特警，定係GTA4裏面嘅大賊，日日都係槍林彈雨、風聲鶴淚嘅話，相信都會有啲厭。呢個時候，最好就係俾反射神經唞唞，玩番啲要用腦嘅策略遊戲。我同AK都周不時會係Xbox Live上玩Catan、Carcassonne呢兩隻Boardgame改編嘅Arcade遊戲調劑吓。不過，話就話調制，其實對打嘅時候一樣係拼過你死我活 ：）嚟緊嘅呢隻叫”Ticket to Ride”嘅XBLA遊戲，應該都會係我哋下一個逐鹿嘅戰場。
暫時根據Teamxbox嘅Hands-on，Ticket to Ride會係畀2-5人對戰，當然可以加入AI對手。發售日同價錢未定，不過800points走唔甩啦。
Teamxbox: Ticket to Ride Hands-On
以下整多段介紹原作boardgame版Ticket to Ride嘅片段，希望可以毒到你啦：P
今日係Xbox Life網站見到台灣Xbox減價既消息，「台灣微軟今天宣佈調降Xbox 360豪華版主機價格，估計零售價由新台幣12,480元調降至為新台幣10,360元，降幅高達17%，整整省了新台幣2,120元！」
AK見到之後即刻諗，香港會唔會都有得減呢…?不過入到官網似乎又唔多覺眼有相關既資料喎…咁就掉低左唔諗啦…點之揭下揭下報紙，係蘋果既既C7(即係娛樂版，唔好一見到C7就以為係C朗拿度先得架)有個Xbox既全版廣告，個廣告入面就係一大堆Game，排頭三既係Ninja Gaiden 2，龍珠Burst Limit同埋「幻之名作」Gundam Operation:Troy(唔係好明點解佢揀依隻…其實如果講矚目，首選絕對係GTA4，要日系game既，就唔該Soul Calibar 4啦)…角落頭就有部白盒既Xbox 360，即係連Harddisk果個version，寫住最新勁抵價2499…但係再上官網，又係見唔到有相關既料…
之前連Harddisk既Xbox 360，應該要2799…即係落左三舊水…AK好自然咁諗，今次減價，應該就係充著對手隻「蜜桃雞」Metal Gear Solid即將推出而來…無論點都好，依家百物騰貴，Xbox 360減價益玩家，對於未買機既一眾而言，自然係大好消息，對於我地依d務求達至「人人毒我，我毒人人」既機主而言，平多三舊，要毒人又容易d…
PS: AK剛剛收到電話，GTA4有得攞，仲要又係…三舊水…咁平???唔知有無QK…驚驚…
AK-47，以高可靠度於越戰中聞名的自動步槍，有「美國的Coca Cola，日本的Sony，蘇聯的AK」之譽，曾經是東歐及亞洲(包括中國在內)多國軍隊的標準裝備，亦為香港一眾「賊皇」樂意採用。由於後座力過猛及上跳嚴重，影響射擊精度，難以擊中三百米外目標，但仍足以應付一般性的近距離遭遇戰。
ＰＣ，行年三十有‘X’，上有高堂，下有妻房，理應修心養性，可惜心野難馴，依然（想）日日打機。但發現現實係好遊戲太多、時間太少，現已練成『買咗都唔玩』神功，口中唸唸有詞：「寸金難買寸光陰。。。」云云。