也許當時年紀小

任天堂紅白機，廿幾三十歲歲港男人人都玩過。小弟PC我都不例外，都曾經為佢瘋狂過。託我做日本電器水貨嘅阿叔嘅福，係佢屋企，紅白機日本第一年推出嘅遊戲我都通通玩過。網球、波子機、鑿冰、越野電單車。。。當時真係覺得好正。二十年過去，當我哋玩遊戲玩到連Halo 3都覺得未夠靚未夠刺激嘅時候，望番轉頭，昔日同堂哥爭手制玩頂龜嘅我去咗邊呢？

可愛いいいい～～(^^!)

雖然未必直接同Xbox有關（Guitar Hero 3 Xbox360 有售），但係總算賞心悅目。

夏日不再吹寒風:遊戲界的厄爾尼諾

呢幾年來，遊戲壇其實有個新勢頭，就係一眾遊戲商不再將佢哋嘅年度大作逼晒係近年尾先推出，而係轉而將啲大作嘅首賣日平均分佈於各個季度。今年呢個趨勢變得更加明顯、極端，竟然o係傳統最淡嘅5、6月份推出世紀大game GTA4同埋MGS4！

查實呢個現象其實同玩家嘅demographic嘅趨勢有關。往年，各大遊戲出版商都係挨近美國感恩節同聖誕節假期推出最有潛質嘅作品，好似06年嘅Gears of War、07年嘅Call of Duty 4等等。無他嘅，因為傳統智慧係話電玩遊戲呢啲係“細路仔玩具“，趁父母、祖父母買禮物畀小朋友嘅季節推出，應該會有最大效益。

但係時移勢易，就美國為例，根據ESA 2007年六月嘅統計，遊戲玩家嘅平均年齡係33，18歲以上嘅玩家仲佔成72%！玩家不單不再係細路，好多已經係榮升父母輩啦。想買就買，何需等年尾、等人送呢？

另一個原因，就係事實上，今時今日出版商們實在有太多大作要推出。隻隻ｇａｍｅ都係大投資大製作，07年年尾我哋見到好多機迷期待嘅作品因為同另一大作嘅推出日撞期，被逼要讓路延遲推出。機迷就算有錢買，都未必有時間玩；就算有時間，短時間內玩差不多玩法嘅遊戲，點都會悶。試諗下，假如Rainbow Six Vegas 2喺Call of Duty 4嘅同一個月推出，能否可以同樣賣得咁成功（全球200萬隻！），不容樂觀。

好遊戲連珠砲發對遊戲迷當然係好事，但對我來講，眼見未玩嘅game逐個月堆起嚟，真係有啲心虛。。。

另，廣告一則：由明天起叉盒日替會有《夏日360遊戲巡禮》，一連兩個禮拜介紹十隻（以上？）6-8月推出嘅遊戲，全部係AK同小弟我嘅心水選擇，敬請留意。