回味翻叮:Lost Odyssey 失落的奧德賽

6 03 2009

lo3_800x6001

一個人能活上千年,是一種什麼滋味呢?親歷無數的悲歡離合後,不老不死的生命是否只是意味着日復日的虛空?

繼續閱讀文章 »





回味番叮: GTA IV

24 06 2008

花左唔知幾多時日,終於完成左今年其中一隻必玩遊戲GTA IV既故事模式,於是就整左呢一篇俾呀老編PC…

首先,大家要知道GTA IV係d咩黎先,GTV IV係由Rockstar開發,用於次世界Console平台(XBox 360 / PS3)上既遊戲,其中既重點在於建立左一個極之龐大既遊戲世界(今次GTA IV入面參考左真實的New York City,建立在一個叫Liberity City既虛疑世界),遊戲就係一個Free World模式,基本上,你係入面既Action係完全可以自已決定…由於遊戲一般來講都係以Underworld既黑暗規律(即係一個犯罪世界,玩家係入面既主要活動就走私,販毒,殺人,開火…諸如此類),所以每一集GTA既推出,基本上都係會被一班「衛道之士」所抗議…不過,作為一個玩家,對於依d不關涉既議題,基本上係好少理既…

GTA IV既故事係由偷渡進入美國,來到Liberity City尋找表親Roman既東歐人Niko Bellic到步開始,一心希望實現American Dream既Niko發現,Roman之前係家書入面所寫既奢華生活完全係講大話,而且仲欠落大耳窿一大筆債…為左保護依個唔似樣既表哥,Niko逐步踏入左Liberity City既地下世界,由一個靠拳頭恐嚇收爛數既古惑仔開始,最後捲入Liberity City入面,六大黑幫家族既角色中既一個磨心…

而隨著故事既開始,Niko Bellic會同唔同既人物進行Interaction,而係依d Interaction之間,我地會逐步睇到Niko Bellic經已破碎既靈魂…Niko本身既國家爆發內戰,本著一腔熱血,Niko與一班同鄉朋友一齊投身成為軍人,但係係一次任務之中,部隊內既內鬼(Niko既其中一個同鄉老友)將整隊人出賣…Niko成為部隊僅存既三個倖存者,之後被標籤為「叛徒」,被迫出國,去到歐洲,從事販運人口既勾當,結果遇上左警方既堵截,任務失販,成為黑白兩道追緝既人物…係迫於無奈既情況下,Niko到Liberity City投靠Roman…

Niko接觸既每一個人物,都有著佢自己本身既過去,而且係一個比一個更加陰沉,黑暗,成個遊戲既tone係一路向悲劇既方向發展,最後Niko亦都因為踏足犯罪世界而最終不能自拔,付上左極大既代價…由於遊戲入面涉及左極之大量既犯罪活動(其中一個任務係打劫銀行,期間要突破由LCPD特警所組成既包圍網),加上唔少殘殺他人既情節,所以依隻遊戲,係只推介俾心智成熟既玩家(唔好玩完隻game之後學日本秋葉園個「毒男」咁,衝出旺角亂咁殺人)…成隻Game係充滿左電影感,基本上玩game就好似睇戲一樣…一隻好既遊戲,就係應該可以令到玩家有咁既投入感(即使妳唔鐘意打機,但係亦都應該可以感受到故事既感染力,就好似睇一本好書既感覺一樣…)

的確GTA IV既最大吸引力係來自佢個劇本,但係同時地佢係技術上都有好多既突破,雖然畫面正如之前講過,唔算係超級頂班,但係考慮到佢果個龐大既遊戲世界,Niko駕駛著一個車,由城市內既一個島穿過去另一個島,中間係唔會有明顯既Load碟情況,單係依一點就係一個重大既突破,而且遊戲係以實時進行,有日與夜既交替,陰與晴既天候變化,其中光源及物件都會因應而改變,創造一個擬真既世界,反映製作團隊既卓越技術力…

遊戲入面有電台(19個),電視台(八至九個不同節目)以及互聯網(30多個網站,其中部份係會不停更新),全部都係搆成一個整體世界既細節,遊戲入面Niko可以用手提電話聯絡不同角色,甚至溝女,大家會一齊出街玩,有各式活動(打保齡,打Pool,掟標,睇脫衣舞…),一個遊戲,單人模式就已經係咁豐富,仲有online既多人連線模式…

整體來講,GTA IV必然係當今眾多遊戲之中,其中最頂班既作品之一,AK認為,係任何擁有次世代主機既機主必玩既一隻作品…





夏日360遊戲巡禮(五): Battlefield: Bad Company

10 06 2008

Bad Company

AK既老毛病就係太過專注…眼看住係屋企堆係度未打既game開始陸續堆積,就開始有d緊張…無他既,入左隻「戰國無雙2」有成三十幾個人物 ,之後又入埋隻Condemned 2,郁都未郁過,最近又因為見個價平,連原本話入又唔入既Dragonball Z Burst Limit(299連設定集加figure)都入埋…偏偏隻GTA 4就仲係連故事模式都未打完…所以依三日就的起心肝,不停咁打…總算搞掂左果粒鑽石…結果自然係…脫稿啦…

老編PC交改既Battle Field: Bad Company,download個trial都要成1.5GB,好誇張下…依隻Game面對住之前咁多隻強勢既First Person Shooting,要跑出都真係要有d「符fit」…今次BF既重點係在於全面Destructible Environment,即係你只要對個target做成到足夠既傷害,理論上畫面入面任何既野,你都可以打爆佢…依一點係個demo入面係都可以感受到既,你坐左架裝甲車駛入個廢棄村落俾人圍攻,激戰之間就自然會發現,有d建築物係會被你打lum左既…不過,AK暫時唔覺得依一點除左係視覺上既Eye Candy之外,係戰術上對玩家有幾大既影響,起碼…唔似得Rainbow 6: Vegas 2入面,d cover可以打穿唔震撼…

另外,BF對於戰死沙場一貫都唔會太嚴重咁懲罰玩家,基本上都係俾你係附近就地Respawn,今次Bad Company入面,你果幾位Company似乎係打不死既,基本上你都唔駛點顧佢地,係戰場入面,顧掂自己就OK啦…

Battle Field: Bad Company係六月中出街,雖然依幾個月會有唔少game出,但係出名既FPS似乎係得隻BF,FPS中毒者無可選擇之下,Bad Company應該不難跑出既…

Vodpod videos no longer available.





板垣 伴信宣佈辭職並入稟控告Tecmo!

3 06 2008

根據1up最新報導,忍者外傳系列及Dead or Alive系列作者 板垣伴信 於今日(3/6)日本時間2:30pm向各大傳媒發佈公開信,透露佢已經辭職並將於七月一日離開Tecmo,並且宣佈佢早前已經入稟控告Tecmo嘅主席安田善巳,追討共1億4600萬日圓賠償。

據板垣在公開信內嘅陳述,佢撤職及控告Tecmo嘅原因係因為Tecmo不單未有依照承諾,喺板垣完成Dead or Alive 4後支付花紅,當板垣同主席安田對質嘅時候,安田不但拒絕,近隨後於板垣嘅同事及下屬面前講咗好多詆毀佢嘅說話。板垣認為受到情緒困擾,亦令到工作嘅環境同個人關係變得惡劣,佢喺冇辦法下辭職。

板垣亦係公開信中向佢嘅遊戲支持者表示歉意,今日出版嘅忍者外傳2將會係最後,佢亦不能參與Dead or Alive 5嘅製作,但係佢既離職係迫不得已。“因為我已經不能再和主席安田善巳合作,一個雖然有能力但仍然選擇違背承諾的人。”





Resident Evil 5 新Trailer

2 06 2008

Resident Evil 5會係次世代遊戲機推出嘅消息已經講咗成兩年啦,嗰個Teaser Trailer都番睇過唔少次。終於前日Gametrailer獨家播放Capcom釋出嘅新Trailer,當中有唔少Gameplay片段。係非洲嘅熾熱陽光下,不安感反而更加提升?!

Vodpod videos no longer available.




回味翻叮:Rainbow Six Vegas 2

1 06 2008

依排AK既私人生活出現左重大變動,情況就好似係Roller Coaster(即係唔及四川果邊咁大鑊,所以大家唔駛捐錢俾AK,請捐俾果邊d災民啦,佢地好需要大家幫手架)咁誇張,所以有成兩個星期脫左稿…

經歷左兩個星期之後,總算生活又重會正軌(其實實質係太過沉迷於「正常,健康既犯罪生活」GTA4),為左避免俾老編PC「殺他死」,於是就惟有暫時放下「殺人放火金腰帶」既生活,開始「中年筆耕」既生涯,今次既回味番叮要講既係早前萬眾期待,但最終因為大貨及時應市(多謝代理迅速行動,人人有Game打),結果炒唔起既Rainbow Six Vegas 2。

首先係,大家應該點樣去睇Rainbow Six Vegas 2呢隻Game呢?類型上,佢當然係一隻FPS啦,但係當你正式玩起上黎既時候,你又會發現同你之前打既Gear of War,Call of Duty 4等等係有d唔同既,最大既分別係,成個game整個pace係唔似一般既FPS咁緊迫,你係有時間係去plan你個attack既…留意啦,plan呢個字好緊要,因為R6V2係標榜Tactical,即係講求戰術性既一隻Shooter…

R6V2既戰術性係由好多個唔同既因素所組成既,其中一個重點就係在於一貫以黎,同一個系列既出色版面設計,整個戰場環境既Set Up唔單單只係像真,而係合乎正式同類型建築物既設計,酒店似番酒店,煉油廠似番間煉油廠…唔好以為依樣好容易,好多FPS為左遷就遊戲性既考慮,搞到d地圖變左迷宮咁不倫不類,完全唔似正式既建築物…

合乎正式建築物既設計除左加強左玩既時候既代入感之外,另外一個重點就係不少的建築物係有四通八達既出入口同埋通道,配合R6V2敵人既卓越AI,結果就係出現唔少係無預期既情況下遭人突襲既場面…所以,打R6V2既刺激感唔係來自於急速既遊戲節奏,反而係沿自於果種隨時係無預備之下俾敵人突擊既壓力…

講到AI,自然又唔可以唔提下自家人既AI,依一方面來講,R6V2雖然標榜小隊合作,不過就唔見得真係特別地出色,大致上既表現都只係中規中矩,當然無話好似Army of Two果隻會自己衝入敵人火線度捱子彈,之後坐低叫救命,迫你救佢果隻咁差,但係就同Gear of War差不多,打人都係靠自己啦…

咁…彈開自己人個AI,又順手彈埋R6系列一直以來都俾人鬧既另一個地方,就係佢既畫面質素…雖然R6V2比起上一集來講係有左一d既改善,但係你話佢追得上依家頂班FPS既水準,AK就覺得有d勉強啦…相信有唔少既玩家可能係單純係出面睇Demo既時候,見到個咁既畫面質素而卻步都唔定…

打R6V2另一個重點,當然係Multi play啦,今次相對於R6V來講,Multi play既改進算係好大既,首先係你可以join朋友個in game打co-op,AK總係覺得,FPS唔係一個單人遊戲,由其係R6系列所標榜既戰術性,係一定要一隊人先做到…另外,Terrorist Hunt又係一個必玩既feature,雖然…有時好似係被Terrorist去Hunt咁…仲有就係,你係Single Play入面可以升Level,開新槍新甲,依點對於AK依d FPS「苦手」來講,係相當親切既設計…

最後,都係要彈多一樣野,就係去到最後尾,居然出動到戰鬥直升機黎「欺凌」玩家,雖然係其他FPS入面,唔好講直升機,就連坦克,戰鬥機榜人呀…都曾經打過唔少,但係係R6V2入面,你拎住枝「豆槍」去射架直升機就真係…另外,最後尾手刃叛徒既感覺唔係好得…多多少少同個畫面質素有d關係…

Anyway…R6V2,AK會俾8分…





Prince of Persia新作(續報)

30 05 2008

剛剛過去嘅Ubiday’08,Ubisoft公佈咗呢隻game嘅新圖片同買Trailer。今次嘅美術風格十分特別,係採用一種半Cellshade半貼圖嘅方法,主角同環境設計著重帶出阿拉伯民族強悍一面,女主角亦都相當省鏡(AK同我都係咁話)。睇埋Trailer,好似有少少Final Fantasy feel添!

Vodpod videos no longer available.

以上圖片由Gamespot.com提供,一句唔該!